Nakadakop ang Police Regional Office 7 (PRO7) og 480 ka mga suspetsado atol sa ilang gipahigayon nga Simultaneous Anti-Criminality and Law Enforcement Operations gikan Hunyo 26 hangtod 29, 2026 sa tibuok Central Visayas. Nasakmit usab sa kapulisan ang 2,380.13 gramos sa gituohang shabu nga adunay gibanabana nga kantidad nga ₱16.18 milyon.
Sa kampanya batok sa ilegal nga drogas, 211 ka drug personalities ang nadakpan ug nakumpiskar ang maong mga gituohang shabu. Samtang sa operasyon batok sa ilegal nga armas, 27 ka tawo ang nasikop ug 81 ka armas ang narekober, lakip ang 11 ka armas nga boluntaryong gitugyan tungod sa napaso nga permit ug lisensya. Nakuha usab ang 153 ka mga bala.
Padayon usab ang operasyon sa PRO7 batok sa mga wanted person diin nadakpan ang 10 ka Most Wanted Persons ug 70 pa ka ubang wanted. Sa kampanya batok sa ilegal nga sugal, 172 ka mga indibidwal ang nadakpan, kadaghanan tungod sa ilegal nga number games, iligal nga card games, ug Cara y Cruz o mas nailhan sa uban nga “Hantak.”
Ang tanang nadakpan karon anaa na sa kustodiya sa kapulisan samtang giandam ang mga kasong ipasaka batok kanila. Ang tanang ebidensya nga narekober gitugyan na usab sa Regional Forensic Unit alang sa laboratory examination ug hustong pagdumala.
Sumala ni Police Brigadier General Arnold E. Abad, Regional Director sa PRO7, nagpakita ang maong operasyon sa lig-on nga paningkamot sa kapulisan sa pagbatok sa kriminalidad ug pagsuporta sa Safer Cities Initiative sa Department of the Interior and Local Government. Matud pa niya, magpadayon ang PRO7 sa walay hunong nga kampanya aron masiguro nga malinawon, luwas ug hapsay ang mga komunidad sa Central Visayas.
I via Renante Socia Lada