Nasikop sa mga awtoridad ang usa ka high-value target (HVT) atol sa buy-bust operation nga gipahigayon sa Philippine Drug Enforcement Agency (PDEA) kauban ang ubang law enforcement units alas 12:26 sa kadlawon sa Hulyo 1, 2026, sa Barangay Magatas, Sibulan, Negros Oriental.
Ang nadakpan giila nga si Hassanor Maomin Pazaulan, alyas “Noknok,” 35 anyos, walay trabaho ug lumulupyo sa Tamparan, Lanao del Sur. Gipasanginlan siya og paglapas sa Sections 5 ug 11, Article II sa RA 9165 o ang Comprehensive Dangerous Drugs Act of 2002.
Narekober gikan sa suspek ang kapin 1,050 gramos nga gidudahang shabu, lakip ang usa ka vacuum-sealed nga pakete nga adunay dul-an sa 1 ka kilo ug lima ka sachet nga adunay dugang 50 gramos. Ang mga drogas adunay gibanabana nga street value nga ₱3.15 milyon ug standard value nga ₱7.14 milyon.
Nakompisar usab sa operasyon ang usa ka Android cellphone, buy-bust money nga naglangkob sa usa ka tinuod nga ₱1,000 nga kuwarta ug 29 ka buok nga boodle money, usa ka itom nga sling bag, ₱700 nga cash sa nagkalain-laing denominasyon, ug usa ka plastik nga pakete nga adunay hulagway sa tigre.
Padayon karon ang imbestigasyon sa mga awtoridad aron mahibal-an ang posibleng koneksyon sa suspek sa ilegal nga kalihokan sa droga ug aron mapasakaan siya sa angayng kaso.
I via Renante Socia Lada ug Roy OrtegaLhem Librea