Luwas ang 48 ka pasahero ug 3 ka tripulante sa usa ka motor bangka human kini nakasinati og problema sa makina sa taliwala sa dagat duol sa Barangay Sabang, Olango Island, Lapu-Lapu City, Martes, Pebrero 25, 2025.
Ang insidente gireport sa hotline sa Olango Police Station, hinungdan nga dali silang mitabang sa pagresponde. Ang motorbangka, nga nagbiyahe gikan sa Caubian Island padulong sa Olango mainland, napakyas sa pagpadayon sa dagan tungod sa deperensya sa makina ug nasangit sa kusog nga balud.
Nihimo dayon og lakang ang Olango Police, kauban ang City Risk Reduction Management Office sa Lapu-Lapu City, Philippine Coast Guard substation, Bureau of Fire Protection, ug mga lokal nga mangingisda aron makapadangat dayon og tabang.
Migamit og rescue boats ug life-saving gear ang mga tinugyanan sa pagpangluwas aron makaduol sa sa insudente. Tungod sa ilang paspas ug hapsay nga aksyon, luwas nilang nakuha ang tanang sakay ug gihatagan og dayon nga medikal nga atensyon.
Sumala sa inisyal nga imbestigasyon, napakyas ang makina sa motor bangka ug bisan pa sa paningkamot nga ayo-on kini, wala kini naayom. Nagsugod na usab og sud ang tubig sa sakayan, hinungdan nga nagkinahanglan og dali nga pagluwas.
Gidayeg ni PBGen Redrico Maranan, Regional Director sa PRO7, ang kakugi ug propesyonalismo sa mga rescue teams nga mitabang sa maong operasyon.
Gipasabot usab niya nga ang maong insidente nagpahinumdom sa kaimportante sa ka andam ug panaghiusa sa pag-atubang sa mga hagit sa kadagatan.
Sa kataposan, mapasalamaton kaayo ang mga pasahero sa paspas ug organisadong pagresponde nga nakasiguro sa ilang kaluwasan atol sa emerhensya.
Source: PRO7-PIO
I via Renante Socia Lada