Padayon ang kampanya sa Cebu Police Provincial Office (CPPO) batok sa kriminalidad ug mga paglapas sa lokal nga ordinansa. Kagahapon Hunyo 27, 2026, mikabat sa 447 ka tawo ang nadakpan sa tibuok lalawigan atol sa ilang Safer Cities Initiative.
Sumala sa CPPO, adunay 252 ka police operations nga gihimo sa nagkadaiyang lungsod ug siyudad sa probinsya. Lakip sa mga nadakpan ang 285 ka traffic violators, 66 ka menor de edad nga nakalapas sa curfew, 62 ka tawo nga nag-inom sa pampublikong lugar, 17 ka nanigarilyo sa publikong lugar, 15 ka naglakaw nga walay sapot sa taas nga lawas, ug 2 ka kaso sa pagpatukar og karaoke lapas sa gitugot nga oras.
Sa kinatibuk-an, 285 ka violators ang gipamulta samtang 162 ang gipasidan-an ug gibuhian subay sa lokal nga ordinansa. Mokabat sa ₱105,150 ang nakolektang multa gikan sa operasyon.
Gipasalamatan ni Cebu Governor Pamela Baricuatro ang paningkamot sa kapulisan ug giingong importante ang kooperasyon sa publiko aron mapadayon ang kalinaw ug kahapsay sa probinsya.
Gipasiugda usab ni PRO-7 Regional Director PBGen Arnold Evangelista Abad nga ang padayon nga presensya sa kapulisan makatabang sa pagpugong sa krimen.
Matod pa ni Cebu PPO Provincial Director PCol Abubakar Udang Mangelen Jr., ang tumong sa kampanya dili lamang ang pagdakop sa mga nakalapas sa balaod kondili usab ang pagdasig sa disiplina, responsibilidad, ug aktibong partisipasyon sa komunidad aron masiguro ang kaluwasan sa tanang Sugboanon.
I via Renante Socia Lada