Gipalig-on sa Cebu Police Provincial Office (CPPO) ang kampanya alang sa mas luwas nga mga komunidad pinaagi sa padayon nga pagpatuman sa mga lokal nga ordinansa ilalom sa “Safer Cities Initiative.”
Base sa CPPO adunay 228 ka operasyon nga gihimo nga misangpot sa pagdakop sa 442 ka mga tawo nga nakalapas sa lainlaing ordinansa. Tumong niini ang pagmintinar sa kalinaw, kahapsay, ug disiplina sa mga pampublikong lugar.
Sa talaan sa mga nakalapas, 294 ka kaso ang may kalabutan sa city ug municipal traffic ordinances, 59 ka menor de edad ang nadakpan tungod sa paglapas sa curfew, 45 ka kaso sa pag-inom og ilimnong makahubog sa pampublikong lugar, 22 ka kaso sa panigarilyo sa publiko, ug 22 ka kaso sa paglakaw sa pampublikong lugar nga dili angay ang gisul-ob. Ang operasyon nakatigom usab og kapin ₱129,000 nga multa ug silot.
Gipasalamatan ni Cebu Governor Pamela Baricuatro ang lig-on nga panagtinabangay sa lokal nga kagamhanan ug kapulisan sa pagpalambo sa kaluwasan sa komunidad.
Matud niya, dili lamang pagpatuman sa balaod ang tumong sa programa kundili ang pagpalambo usab sa disiplina, responsibilidad, ug pagtahod sa balaod sa katawhan.
Samtang, giingon ni Cebu PPO Provincial Director PCOL Abubakar Udang Mangelen Jr. nga magpadayon ang ilang anti-criminality ug ordinance enforcement operations aron mapreserbar ang kalinaw ug kahapsay sa lalawigan.
Gidugang niya nga pinaagi sa regular nga operasyon ug duol nga koordinasyon sa mga lokal nga opisyal, mas mapalig-on ang kaluwasan ug seguridad sa mga komunidad sa tibuok Cebu.
I via Renante Socia Lada