Padayon ang Cebu Police Provincial Office (CPPO) sa ilang gipakusog nga operasyon ubos sa Safer Cities Initiative, diin 427 ka mga nakalapas sa lokal nga ordinansa ang nadakpan sa tibuok lalawigan sa Hulyo 2, 2026.
Sa kinatibuk-an, 216 ka police operations ang gihimo sa nagkalain-laing lungsod sa probinsya. Lakip sa mga nadakpan ang 68 ka nag-inom og ilimnong makahubog sa pampublikong lugar, 20 ka nanigarilyo sa bawal nga lugar, 12 ka naglakaw nga walay sul-ob nga pang-ibabaw, 38 ka menor de edad nga nakalapas sa curfew, siyam ka nakalapas sa oras sa paggamit sa karaoke, ug 280 ka nakalapas sa mga traffic ordinance sa ilang lungsod o siyudad.
Sumala sa CPPO, 280 ka mga nakalapas gipamulta samtang 147 ang gipahimangnoan ug gipagawas subay sa lokal nga ordinansa. Mokabat sa ₱134,950 ang nakolektang multa gikan sa maong operasyon.
Matod sa CPPO, magpadayon ang ilang kampanya aron mapalig-on ang kalinaw ug kahapsay sa Cebu. Giawhag usab sa kapulisan ang tanang Cebuano nga motuman sa mga lokal nga ordinansa ug makigtambayayong aron mapadayon ang usa ka malinawon, disiplinado, ug luwas nga komunidad.
📸 CPPO
I via Renante Socia Lada