Nasikop sa kapulisan ang usa ka 72 anyos nga lalaki nga wanted sa kasong rape atol sa manhunt operation nga gihimo sa Barangay Hilotongan, Bantayan, Cebu niadtong nakalabay nga mga adlaw.
Gidakop ang suspetsado sa mga operatiba sa Bantayan Municipal Police Station pinaagi sa warrant of arrest nga gi-isyu sa Regional Trial Court, Branch 81 sa Bogo City, Cebu. Walay gitakdang piyansa ang maong kaso, busa gidiretso siya sa kustodiya sa kapulisan.
Human sa pagdakop, gipahibalo ang suspetsado sa iyang mga katungod ubos sa Miranda Doctrine ug sa Anti-Torture Act sa pinulongang iyang nasabtan. Sa pagkakaron, nagpabilin siya sa kustodiya sa Bantayan Municipal Police Station samtang gihulat ang iyang turnover ngadto sa korte alang sa dugang legal nga proseso.
Sumala ni Police Colonel Abubakar Udang Mangelen Jr., Director sa Cebu Police Provincial Office, padayon nilang palig-onon ang mga operasyon batok sa mga wanted person aron matubag ang hustisya.
Giawhag usab niya ang publiko nga magpadayon sa paghatag og kasayuran sa kapolisan aron mas mapadali ang pagdakop sa mga naglikay sa balaod ug mapadayon ang kalinaw ug kahapsay sa lalawigan.
📸 CPPO
I via Renante Socia Lada