Ang Cebu Police Provincial Office (CPPO) nakadakop og 421 ka mga tawo nga nakalapas sa nagkalain-laing lokal nga ordinansa atol sa 228 ka operasyon nga gipahigayon sa tibuok lalawigan kagahapon Hunyo 25, 2026. Kabahin kini sa padayon nga Safer Cities Initiative aron mapadayon ang kalinaw, kahapsay ug disiplina sa komunidad.
Base sa report sa CPPO, 278 sa mga nadakpan nakalapas sa traffic ordinansa, 59 ang nasakpan nga nag-inom sa pampublikong lugar, 51 ka menor de edad ang nakalapas sa curfew, 18 ang naglakaw sa publiko nga dili husto ang sapot, 17 ang nasakpan nga nanigarilyo sa bawal nga lugar, ug 2 ang nakalapas sa oras sa paggamit sa videoke. Mokabat sa ₱127,600 ang nakolektang multa gikan sa mga paglapas.
Gipasalamatan ni Cebu Governor Pamela Baricuatro ang panagtinabangay sa kapulisan ug mga lokal nga panggamhanan sa pagmintinar sa kalinaw ug kahapsay sa lalawigan. Matud niya, importante ang kooperasyon sa tanang Sugbuanon aron mapalig-on ang disiplina ug pagsunod sa balaod.
Samtang, giingon ni Cebu PPO Provincial Director PCOL Abubakar Udang Mangelen Jr. nga magpadayon ang ilang operasyon batok sa mga paglapas sa ordinansa ug uban pang kalihokan aron masiguro ang kaluwasan sa mga komunidad sa tibuok Sugbo.
📸 CPPO
I via Renante Socia Lada