Mokabat sa 401 ka tawo ang nadakpan sa nagkadaiyang operasyon sa kapulisan sa tibuok Sugbo sa Hunyo 14, 2026 isip kabahin sa Safer Cities Initiative nga gipatuman sa Cebu Police Provincial Office (CPPO). Ang kampanya gilusad pinaagi sa OPLAN Bulabog, OPLAN Sita, ug Night Watch aron mapalig-on ang kalinaw ug kahapsay sa mga komunidad.
Sumala sa CPPO, adunay 238 ka police operations nga gipahigayon sa lainlaing lungsod ug siyudad sa probinsiya. Tungod niini, nakolekta usab ang kapin ₱103,150 nga multa gikan sa mga nakalapas sa lokal nga mga ordinansa ug balaod.
Pinakadaghan sa mga nalapas mao ang mga traffic ordinance violations nga miabot sa 236 ka kaso. Gisundan kini sa 67 ka kaso sa curfew violations nga naglambigit sa mga menor de edad, 42 ka kaso sa pag-inom og makahubog nga ilimnon sa pampublikong lugar, ug 21 ka kaso matag usa sa pagpanigarilyo sa publikong lugar ug paglakaw nga walay sul-ob nga sinina sa ibabaw sa lawas. Aduna usab pito ka kaso sa videoke o karaoke nga milapas sa gitugot nga oras ug pito ka ubang paglapas sa ordinansa.
Sa kinatibuk-an, 236 sa mga nadakpan gipamultahan samtang 165 ang gipahimangnoan ug gipagawas. Wala’y kaso nga gidangat sa korte. Matud ni CPPO Provincial Director PCOL Abubakar Udang Mangelen Jr., ang disiplina usa ka responsibilidad nga dapat tumanon sa tanan aron mapadayon ang kalinaw ug kaluwasan sa komunidad.
Gidayeg usab ni Police Regional Office 7 Director PBGEN Arnold Evangelista Abad ang CPPO tungod sa ilang padayon nga kampanya. Samtang gipadayag ni Cebu Governor Pamela S. Baricuatro ang suporta sa kagamhanan sa probinsiya sa maong inisyatiba. Giingon sa CPPO nga magpadayon sila sa mas lig-on ug komunidad nga pamaagi sa pagpatuman sa balaod aron masiguro ang mas luwas ug disiplinadong Sugbo alang sa tanang residente.
I via Renante Socia Lada