Nasikop sa kapulisan ang usa ka 45-anyos nga lalaki human kini gireklamo nga nagpabuto sa Sitio Latab, Barangay Calidngan, Carcar City sa gabii sa Hunyo 14, 2026.
Sumala sa Carcar City Police Station, nakadawat sila og report gikan sa usa ka concerned citizen alas-10:15 sa gabii mahitungod sa usa ka armadong lalaki nga nagpabuto sa maong lugar. Dali nga mitubag ang mga pulis ug miadto sa lugar aron susihon ang insidente.
Pag-abot sa mga otoridad, ilang nadakpan ang suspetsado mga alas-10:25 sa gabii. Nakuha gikan kaniya ang usa ka .357 caliber revolver, lima ka buok bala, ug usa ka basiyo nga kabhang sa maong kalibre.
Wala makahimo ang suspetsado sa pagpakita og legal nga dokumento nga nagtugot kaniya sa pagpanag-iya ug pagdala sa maong armas. Human mapahibalo sa iyang mga katungod, gidala siya sa estasyon sa kapulisan alang sa hustong dokumentasyon ug pagpasaka og kaso tungod sa paglapas sa Republic Act 10591 o Comprehensive Firearms and Ammunition Regulation Act.
Gipasalamatan ni Cebu Police Provincial Office Director PCOL Abubakar Udang Mangelen Jr. ang mga pulis nga mitubag dayon sa insidente ug ang mga lumulupyo nga maampingon sa pagreport sa kahimtang. Matod niya, ang kooperasyon sa komunidad ug ang paspas nga aksyon sa kapulisan dakong tabang aron mapugngan ang posibleng peligro ug mapadayon ang kalinaw ug kaluwasan sa probinsya sa Cebu.
I via Renante Socia Lada