Nadakpan sa kapulisan ang usa ka armadong lalaki ug nakumpiskar ang usa ka 9mm submachine gun uban sa mga bala human sa report sa pagpamusil sa Barangay Valencia, Carcar City niadtong Hunyo 13, 2026.
Sumala sa Carcar City Police Station, nakadawat sila og sumbong gikan sa usa ka concerned citizen mahitungod sa usa ka lalaki nga nagpabuto og armas sa Sitio Danao 2, Barangay Valencia. Diha-diha dayong miresponde ang SWAT ug Alert Team sa maong lugar.
Mga alas 12:20 sa udto, malampusong nadakpan sa mga pulis ang suspek. Narekober gikan kaniya ang usa ka 9mm KG9 submachine gun, duha ka magasin, ug 11 ka buok live ammunition sa 9mm. Wala makapakita ang suspek og permit o legal nga dokumento nga nagtugot kaniya sa pagpanag-iya sa maong armas ug mga bala.
Gipahibalo siya sa kaso nga iyang giatubang ug sa iyang mga katungod sa wala pa gidala sa kustodiya sa kapulisan alang sa hustong dokumentasyon ug pagsang-at og kaso tungod sa paglapas sa Republic Act 10591 o ang Comprehensive Firearms and Ammunition Regulation Act.
Gidayeg ni Cebu Police Provincial Office Director PCOL Abubakar Udang Mangelen Jr. ang paspas nga aksyon sa mga pulis ug ang kooperasyon sa mga residente.
Matud pa niya, dakong tabang ang pagmatngon sa publiko aron mapugngan ang posibleng mas grabe nga insidente ug mapadayon ang kalinaw ug kahapsay sa komunidad. Samtang gipadayon sa CPPO ang kampanya batok sa mga ilegal nga armas, ilang gihangyo ang publiko nga daling mosumbong sa bisan unsang kadudahang kalihokan sa ilang lugar.
via Renante Socia Lada