Kapin 315 ka mga suspek ang nadakpan sa usa ka semana nga sunod-sunod nga operasyon sa Police Regional Office 7 (PRO7) gikan Agosto 31 hangtod Septembre 6, 2025 sa tibuok Central Visayas. Nasakmit usab ang iligal nga drogas, pusil, bala, ug mga gamit sa iligal nga sugal.
Sa kampanya batok drogas, 173 ka tawo ang nasikop ug nakumpiskar ang 598.22 gramos nga shabu nga gibanabana og kantidad nga ₱4,067,896.00. Sa operasyon batok pusil, 33 ka armas ug 79 ka bala ang nakuha ug 24 ka tawo ang nadakpan.
Nagmalampuson usab ang manhunt operation sa PRO7 diin 71 ka wanted persons ang nasikop, lakip na ang 12 ka Most Wanted ug 59 nga dugay na nga naglikay sa hustisya.
Samtang, sa kampanya batok iligal nga sugal, 47 ka tawo ang nadakpan sa suertres, sabong ug hantak, diin ₱9,332.00 ang nakumpiskar.
Tanang nadakpan karon anaa gi kustodiya sa kapulisan ug giandam ang mga kasong pormal nga ipasaka batok kanila. Ang mga nakumpiskar nga ebidensya sama sa drogas, pusil, bala ug gamit sa sugal gi-submit na alang sa imbestigasyon ug korte.
Gidayeg ni PBGen Redrico A. Maranan, Regional Director sa PRO7, ang tanang operatiba ug giingon nga kini nga operasyon nagpakita sa seryoso nilang tumong nga himuong mas luwas ang Central Visayas. Dugang pa niya, padayon nilang pangitaon ug dakpon ang tanang makalapas sa kalinaw ug balaod.
Source: PRO7-PIO
I via Renante Socia Lada