Patay ang usa ka 21-anyos nga drayber sa motor human kini maligsan sa usa ka dump truck didto sa Carmelite Junction, Zone 1, Barangay Buaya, Dakbayan sa Lapu-Lapu, alas dos sa hapon niadtong Lunes, Setyembre 8, 2025. Ang biktima nailhan nga si Jeff Lawrence Rojo, residente sa Barangay Pajac.
Base sa imbestigasyon sa Traffic Enforcement Unit (TEU) sa Lapu-Lapu City Police, pareho og agi ang motor ug dump truck nga paingon sa Barangay Ibo. Sa ilang CCTV review gikan sa Buaya ug Nerve Command Center, nakita nga nagdali og tabok ang duha sakyanan aron dili maabtan sa pula nga suga.
Giingon nga misulay og overtake ang biktima sa kilid sa dump truck. Apan samtang nag-una na unta ang motor, nasampakan kini sa trak ug nadaro, hinungdan sa iyang kamatayon diha-diha dayon.
Ang drayber sa dump truck, usa ka 55-anyos nga taga Argao, gi-aresto ug gibutang sa selda samtang nagpaabot pa sa desisyon sa pamilya sa biktima kon mopasaka ba sila og kaso.
Kanunay nag awhag ang mga otoridad nga dili magpakusog sa pagpadagan sa ilang mga sakyanan aron malikayan ang disgrasya.
I via Renante Socia Lada