Gisaulog karong Setyembre 9 ang special non-working holiday sa Cebu City, tibuok probinsya sa Cebu ug sa mga component cities niini. Kini aron paghandom sa natawhan nga adlaw sa kanhi Presidente Sergio Osmeña Sr.
Base sa Republic Act No. 6953, gitakda ang petsa isip “Osmeña Day” aron pasidunggan ang kontribusyon sa ika-upat nga presidente sa Pilipinas. Si Osmeña natawo sa Cebu City niadtong Setyembre 9, 1878. Karong adlawa mao ang ika-147th nga kasumaran sa adlaw nga natawhan sa kanhi Presidente.
Si Osmeña nailhan nga usa sa mga lider nga nagdala og dakong dungog ug kausaban sa politika sa nasud. Usa siya ka respetadong lider nga nagserbisyo ug naghatag og inspirasyon sa mga Pilipino ilabi na sa mga Sugbuanon.
Ang holiday naghatag og higayon sa mga taga-Cebu nga mapahinumdoman ang papel ni Osmeña sa kasaysayan ug ang iyang dakong natampo sa kalamboan sa Pilipinas.
Sa pagsaulog sa “Osmeña Day,” gidasig ang katawhan nga makahinomdom sa sulondon sa maong presidente ug ang iyang pag-alagad sa nasud uban ang tinuod nga kasingkasing alang sa publiko.
I via Renante Socia Lada