Nakapahigayon og malampusong usa ka adlaw nga operasyon batok sa mga wanted persons ang Cebu City Police Office (CCPO), diin 21 ka mga pugante ang nadakpan sulod lamang sa 24 oras.
Ang operasyon gipahigayon pinaagi sa hiniusang pagserbisyo sa mga warrant of arrest sa nagkalain-laing lugar sa dakbayan aron pangitaon ug dakpon ang mga tawo nga adunay nagpadayon nga warrant gikan sa korte.
Sa kinatibuk-an, 17 sa mga nadakpan giklasipikar isip ubang wanted persons, samtang upat (4) ang gilista isip Most Wanted Persons ubos sa nagkalain-laing kategorya.
Human sa ilang pagdakop, gidala dayon ang mga suspetsado ngadto sa nagkalain-laing police station alang sa hustong dokumentasyon, custodial processing, ug koordinasyon sa mga korte nga nagpagula sa ilang mga warrant.
Sumala sa CCPO, ang kalampusan sa operasyon nagpakita sa ilang padayon nga paningkamot sa pagpalig-on sa kalinaw ug kahapsay sa dakbayan, pagsiguro sa pagtuman sa mga proseso sa hustisya, ug pagpakusog sa kampanya batok sa mga wanted persons sa ilang AOR.
Padayon usab ang panawagan sa kapulisan sa publiko nga makigtambayayong ug mohatag og impormasyon aron mas mapalig-on pa ang kaluwasan ug seguridad sa komunidad.
I via Renante Socia Lada