Aktibong miapil ang mga kapulisan sa Cebu Police Provincial Office (CPPO) sa 2nd Quarter Nationwide Simultaneous Earthquake Drill (NSED) nga gipahigayon kagahapon Hunyo 18, 2026. Ang kalihokan kabahin sa padayon nga paningkamot sa kapulisan aron maandam sa posibleng mga linog ug uban pang kalamidad.
Ubos sa pagpanguna ni Police Colonel Abubakar Udang Mangelen Jr., gihatagan og praktikal nga pagbansay ang mga personnel sa hustong pag-atubang sa emerhensiya panahon sa linog. Gisunod nila ang “Duck, Cover, and Hold” nga pamaagi aron mapanalipdan ang kaugalingon samtang naglinog.
Human sa simulasyon, hapsay ug organisado nga mibakwit ang mga partisipante ngadto sa gitakdang assembly areas aron masiguro ang ilang kaluwasan ug kaandam kung adunay tinuod nga linog nga mahitabo.
Matod sa CPPO, ang maong earthquake drill usa ka paagi sa pagpalig-on sa kultura sa kaandam ug kalig-on sa ilang han-ay. Pinaagi sa regular nga mga pagbansay, mas mapalig-on ang ilang abilidad sa pagpanalipod sa ilang mga personnel ug pagpadayon sa serbisyo publiko bisan sa panahon sa kalamidad.
Gipasiugda usab sa CPPO nga ang kaandam sa kalamidad responsibilidad sa tanan. Pinaagi sa padayon nga pagbansay ug disaster risk reduction programs, nagpabiling andam ang kapulisan sa pagresponde, pagpanalipod, ug pag-alagad sa komunidad.
I via Renante Socia Lada