Nagpagawas og pahinumdom ang Cebu City Police Office (CCPO) ngadto sa tanang motorista nga kanunay magsuot og standard nga helmet isip pagsunod sa Republic Act No. 10054 o ang Motorcycle Helmet Act of 2009.
Sumala sa balaod, obligado ang tanang nagmaneho ug nag-angkas sa motorsiklo nga magsuot og protective helmet sa tanang higayon samtang nagbiyahe sa mga dalan ug highway. Ang helmet kinahanglan adunay PS Mark o ICC Sticker ug mosunod sa mga sumbanan nga gitakda sa Department of Trade and Industry (DTI).
Gipasabot usab sa CCPO nga dili sakop sa maong balaod ang mga drayber sa traysikol. Apan alang sa mga naggamit og motorsiklo, gikinahanglan nga siguruhon nga ang ilang helmet luwas gamiton ug naa sa maayong kahimtang.
Ubos sa balaod, ang masakpan nga wala magsuot og angay nga helmet mahimong mapenaltihan og ₱1,500 sa unang kalapasan, ₱3,000 sa ikaduhang kalapasan, ug ₱5,000 sa ikatulong kalapasan. Sa ikaupat ug mosunod nga kalapasan, mahimong makamulta og ₱10,000 ug kumpiskaron ang lisensya sa drayber.
Matud pa sa CCPO, dako ang papel sa helmet sa pagpanalipod sa ulo ug kinabuhi sa motorista panahon sa aksidente. Busa, gihangyo sa kapulisan ang publiko nga himuong batasan ang pagsuot og helmet sa matag biyahe aron malikayan ang grabeng kadaot ug mapalambo ang kaluwasan sa kadalanan.
I via Renante Socia Lada