Usa ka 21-anyos nga lalaki ang gidakop sa kapulisan sa Bantayan karong Agosto 20, 2026, human giingong nagpadala og mga hulga online nga adunay kalabotan sa posibleng pagpamusil sa Bantayan National High School-Senior High School.
Ang suspek gidakop sa Bantayan Municipal Police Station mga alas-11:30 buntag. Wala gipagawas sa kapulisan ang iyang ngalan samtang nagpadayon ang imbestigasyon.
Sumala sa kapulisan, nadawat ang report mga alas-10 sa buntag kagahapon Agosto 19 human usa ka school staff ang mipahibalo bahin sa mga mensahe nga naghulga batok sa eskwelahan ug mga estudyante. Giingong adunay mga mensahe nga nagpasidaan sa posibleng pagpamusil ug nag-awhag sa mga estudyante nga magbantay ug likayan ang eskwelahan.
Gisusi sa mga imbestigador ang mga mensahe ug online account nga gigamit sa pagpadala niini. Human makuha ang impormasyon nga posibleng nagdugtong sa account ngadto sa suspek, gilusad sa kapulisan ang hot-pursuit operation nga misangpot sa iyang pagkadakop karong adlawa.
Ginaimbestigahan ang lalaki tungod sa posibleng paglapas sa Grave Threat, Unjust Vexation, ug mga probisyon sa Cybercrime Prevention Act of 2012.
Gipasiugda ni Cebu Police Provincial Office Director PCOL Abubakar Isang Mangelen Jr. nga seryosohon sa kapulisan ang tanang hulga batok sa mga eskwelahan, ilabi na kung nalambigit ang kaluwasan sa mga estudyante, magtutudlo ug school personnel.
Samtang, gimandoan ni Cebu Governor Pamela S. Baricuatro ang pagpahugot sa seguridad sa mga public ug private schools sa tibuok Cebu. Lakip niini ang pagpalig-on sa police presence ug koordinasyon tali sa kapulisan, eskwelahan ug lokal nga kagamhanan.
Gipahinumdoman usab sa kapulisan ang mga estudyante, ginikanan, magtutudlo ug school personnel nga i-report dayon ang bisan unsang hulga o makapahadlok nga mensahe ngadto sa pinakaduol nga police station. Dili usab angay pasagdan isip komedya ang hulga ilabi na kung adunay espesipikong eskwelahan, petsa, lugar o paghisgot bahin sa kapintas.
Ang suspek nagpabilin sa kustodiya sa kapulisan alang sa dokumentasyon ug pagpasaka sa tukmang kaso ngadto sa prosecutor’s office.