Nasakmit ang usa ka .357 Smith & Wesson Magnum revolver sulod sa school bag sa usa 14-anyos nga estudyante sa Lut-od National High School, Barangay Lut-od, Pinamungajan, Cebu karong Agosto 20, 2026.
Nadiskubre ang armas alas-3:15 sa hapon atol sa kalit nga pagsusi sa mga school bag sa mga estudyante nga gihimo sa usa ka magtutudlo isip safety measure. Dali gipahibalo sa eskwelahan ang kapulisan ug ilang giseguro ang armas nga walay bala.
Sumala sa inisyal nga imbestigasyon, ang armas kuno iya sa apohan sa estudyante ug gitago sulod sa kabinet sa ilang balay. Gikuha kini sa menor de edad ug gidala ngadto sa eskwelahan.
Ang iyang mga ginikanan nagtrabaho sa gawas sa lungsod ug ang bata anaa sa pag-atiman sa iyang mga apohan.
Gihatod ang menor de edad sa Municipal Social Welfare and Development (MSWD) Office samtang gihulat ang pag-abot sa iyang mga ginikanan o legal nga guardian.
Gidayeg ni Cebu Police Provincial Office Director PCOL Abubakar Udang Mangelen Jr. ang mga personnel sa eskwelahan tungod sa ilang pagka-alerto ug dali nga pag-report sa insidente.
Gipahinumdoman usab ang mga tag-iya og armas nga siguruhon kini nga husto nga gitipigan ug dili maabot sa mga bata.
Samtang, gipakusgan sa Cebu Police Provincial Office ang seguridad sa mga eskwelahan sa tibuok Cebu pinaagi sa pagbutang og mga police personnel sa mga eskwelahan. Kini gisunod sa direktiba ni Cebu Governor Pamela S. Baricuatro nga palig-onon ang seguridad sa mga public ug private schools human sa bag-uhay nga pagpamusil sa usa ka senior high school sa Zamboanga City.
Padayon pa ang imbestigasyon sa insidente, samtang ang tukmang intervention alang sa menor de edad gihimo sa koordinasyon sa MSWD ug sa iyang mga ginikanan o guardian.
I via Renante Socia Lada