Dali nga milihok ang Cebu City Police Office (CCPO) human nakadawat og report bahin sa hulga nga adunay mamusil sa eskuwelahan nga gipost sa social media kagabii Agosto 19, 2026.
Ang hulga gitumong sa University of San Carlos (USC) Main Campus sa Sanciangko Street, Barangay Kamagayan, Cebu City. Gisusi dayon sa mga pulis ang post ug nakig-coordinate sa ubang police units aron mailhan ug masubay ang naghimo niini.
Pinaagi sa paspas nga follow-up ug koordinasyon, nasuta ang lokasyon sa suspek ug nadakpan siya kagabii sa Barangay Altavista, Poro, Camotes, Cebu. Gidala siya sa Police Station 1 sa CCPO alang sa hustong proseso.
Sa imbestigasyon, giangkon sa suspek nga siya ang naghimo sa hulga ug iyang gi-access mismo ang iyang TikTok account aron kumpirmahon ang paggamit niini sa pag-post sa maong pamahayag atol sa TikTok Live.
Ang kaso atubangon ubos sa mga probisyon sa Republic Act No. 10175 o Cybercrime Prevention Act of 2012.
Matod sa CCPO, seryoso nilang giatiman ang tanang hulga aron malikayan ang posibleng kadaot ug mapanalipdan ang mga estudyante, school personnel, ug komunidad sa Cebu City.
I via Renante Socia Lada