Gipasiugdahan ni Gobernadora Pamela Baricuatro ug Bise Gobernador Glenn Soco, kauban ang mga opisyal sa Department of Health (DOH), ang pormal nga pagbukas sa duha ka bag-ong Sugbo Bagong Urgent Care and Ambulatory Services (SugBUCAS) Centers sa Cebu City niadtong Miyerkules, Agosto 6, 2025.
Ang bag-ong mga pasilidad mao ang SugBUCAS Capitol ug SugBUCAS Sudlon, nga gipadagan sa Vicente Sotto Memorial Medical Center (VSMMC).
Tumong sa SugBUCAS nga mas mapadali ug mapaduol sa mga Sugboanon ang check-up, tambal sa mga minor nga sakit o samad, ug early health screenings aron malikayan ang mas seryosong problema.
MItambong usab sa pagbukas si Cebu City Mayor Nestor Archival, DOH Assistant Secretary Christian Saquilabon, ug VSMMC Medical Chief Dr. Gerardo Aquino.
Ang SugBUCAS Capitol nagtanyag og minor surgeries nga mahimo sulod sa usa ra ka adlaw—dili na kinahanglan mag-admit sa ospital.
Samtang ang SugBUCAS Sudlon usa ka full outpatient ug urgent care clinic nga modawat og walk-in patients nga adunay dili seryosong mga problema sa panglawas. Naghatag kini og check-up, laboratory tests, ug follow-up consultations.
Tungod niini, upat na kabuok ang SugBUCAS Centers sa Sugbo, apil na ang mga nauna nga nahimutang sa Bantayan Island ug Carcar City.
Source: Cebu Province PIO
I via Renante Socia Lada