Malampuson ang tibuok semana nga anti-criminality operation sa Cebu City Police Office (CCPO) nga OPLAN BULABOG ug OPLAN BAKAL-SITA, nga naglakip sa pagdakop sa duha ka armadong suspetsado, pagluwas sa 579 ka minor nga nakalapas sa curfew, ug pag-isyu sa 28 ka violation tickets sa mga nakalapas sa lokal nga mga ordinansa.
Ang operasyon, nga gipahigayon gikan Marso 17 hangtod Marso 23, 2025, naglakip sa 3,259 ka establisemento nga gi-inspeksyon aron masiguro ang kaluwasan sa tanang 80 ka barangay sa Cebu City.
Sa maong operasyon, duha ka indibidwal ang nadakpan sa Barangay Labangon tungod sa paglapas sa RA 10591 o Illegal Possession of Firearms and Ammunition.
Dugang pa, 28 ka indibidwal ang natiketan tungod sa pag-inom sa pampublikong lugar, pag-ihi sa gawas, public indecency, vandalism, ug paglabay og basura.
Sumala ni CCPO Acting City Director PCOL Enrico E. Figueroa, padayon ang ilang paningkamot sa pagpahugot sa seguridad ug kampanya batok sa kriminalidad.
Gipasiugda usab ni Police Regional Office (PRO) 7 Regional Director PBGen Redrico A. Maranan ang kaimportante sa presensya sa kapulisan sa mga high-crime areas aron mapalig-on ang proteksyon sa katawhan.
Ang Cebu City Police Office nagpasalig nga magpadayon ang ilang mga operasyon aron masiguro ang kaluwasan ug kasayuran sa publiko.
Source: CCPO
I via Renante Socia Lada