Desidido ang pamilya sa batan-ong namatay human maligsi sa usa ka fire truck nga miresponde sa sunog sa Brgy. Paknaan, Mandaue City niadtong Marso 24, 2025 nga mopasaka og kaso batok sa drayber sa maong sakyanan.
Ang biktima nailhan nga si Juan Paulo Mindo, 23 anyos, residente sa Sityo Sunlot, Brgy. Calawisan, Lapu-Lapu City.
Matud sa report, naligsan siya sa fire truck nga gipanag-iya sa Filipino-Chinese Fire Volunteers samtang kini nagpadulong sa lugar sa Brgy. Paknaan mitumaw ang dakong sunog.
Sumala sa amahan sa biktima nga si John Lagare, adunay pagsuway sa areglo gikan sa management sa fire volunteers, apan nag-agad siya sa desisyon sa iyang kanhi asawa, nga naningkamot nga ipasaka ang kaso batok sa drayber.
“Nganong wala man lang mo-minor ang fire truck nga intersection man ang lugar?” pangutana sa inahan sa biktima, nga mikwestiyon sa kaluwasan sa operasyon sa fire truck.
Dugang pa, iyang gikwestiyon ang Team Mandaue kung ngano nga walay traffic enforcer nga nagbantay sa maong dapit niadtong tungora.
Nagpadayon ang imbestigasyon sa mga awtoridad aron matino kung adunay pagpabaya sa bahin sa drayber ug kung unsay angayng buhaton sa legal nga proseso.
I via Renante Socia Lada