Usa ka 18-anyos nga lalaki ang namatay human nabangga ang iyang gimanehong motorsiklo sa usa ka traffic sign sa Natalio Bacalso Avenue, Barangay Bulacao, alas 11:35 sa gabii, Nobyembre 10, 2025 (Lunes).
Ang biktima giila nga si Corey Quijano, nga nagmaneho sa iyang PCX 160 nga motorsiklo.
Base sa imbestigasyon sa Traffic Enforcement Unit (TEU) sa Cebu City Police Office (CCPO) ug sa kuha sa dash cam sa usa ka Suzuki van, nakita nga kusog ang dagan sa motorsiklo ni Quijano samtang nagsubay kini sa inner lane paingon sa Talisay City.
Samtang ang Suzuki van nga gimaneho ni Tinmark Estrada misubay usab sa inner lane paingon sa siyudad sa Sugbo. Pag-abot sa daplin sa Citi Hardware, gisulayan ni Quijano ang pag-overtake sa wala nga lane bisan pa nga double solid yellow line ang karsada. Tungod niini, nabangga niya ang “No U-Turn” traffic sign nga naa sa daplin sa dalan.
Tungod sa kusog nga impact, nalagpot si Quijano ngadto sa pikas lane ug didto naigo sa nagpadulong nga van.
Dali siyang gidala sa Cebu City Medical Center (CCMC), apan gideklarar siya nga dead on arrival ni Dr. Nolie Gabia tungod sa grabe nga kadaot sa iyang ulo ug lawas.
Ang mga awtoridad nagpahimangno pag-usab sa mga motorista nga mag-obserbar sa trapiko, likayan ang overspeeding, ug dili mag-overtake sa delikadong dapit aron malikayan ang susamang trahedya.
I via Renante Socia Lada