Unom (6) ka tawo ang nanga-angol ug siyam (9) ka mga balay ang nadaot human sa landslide nga nahitabo alas 1:00 sa hapon kagahapong Lunes, Nobyembre 10, sa Purok Kaimito 1, Barangay Uling, siyudad sa Naga.
Sumala sa ulahing datos gikan sa City Disaster Risk Reduction and Management Office (CDRRMO), tulo sa mga biktima ang gidala sa tambalanan. Giila silang sila Felipe Labapiz, 74 anyos; Doroteo Villarmea Labapiz, 68 anyos; ug Rica Mae Bariquit, 11 anyos, nga pulos residente sa maong lugar.
Ang mga biktima karon anaa sa Vicente Mendiola Center for Health Infirmary, diin sila gitutokan sa mga doktor samtang nagpadayon ang obserbasyon.
Gipanguna sa mga sakop sa CDRRMO, Bureau of Fire Protection (BFP), Bureau of Jail Management and Penology (BJMP), ug Naga City Police Station ang pagresponde sa hitabo.
Base sa padiunang imbestigasyon, ang kusog ug walay hunong nga ulan nga gidala sa Typhoon Uwan maoy hinungdan sa pagkahilis sa yuta.
Gawas sa mga nanga-angol, 40 ka residente ang giluwas sa mga otoridad ug gipasilong karon sa temporary evacuation center para sa kasiguruan yg kaluwasan.
I via Renante Socia Lada