Nagpadayon ang imbestigasyon sa Cebu City Police Office (CCPO) bahin sa mauling nga nahitabo niadtong Hunyo 18 sa Imus Street, Barangay Day-as, Cebu City. Pinaagi sa padayon nga imbestigasyon ug koordinasyon sa mga opisyal sa barangay ug sa Department of Social Welfare and Services (DSWS), nailhan ang 14 ka menor de edad nga giingong nalambigit sa insidente.
Gihimo ang tanang interbyu uban sa presensya sa mga ginikanan, tigbantay, ug social workers aron mapanalipdan ang katungod sa mga menor de edad ug masunod ang balaod.
Sa case conference niadtong Hunyo 23, nakadesisyon ang biktima ug ang iyang inahan nga dili na mopasaka og kaso batok sa mga menor de edad nga nag-edad og 15 anyos pataas aron dili madaot ang ilang edukasyon ug kaugmaon.
Imbis nga kasohan, ipailalom ang mga menor de edad sa Community Diversion Program aron matabangan sila sa hustong paggiya ug rehabilitasyon. Samtang ang biktima padayon usab nga makadawat og psychosocial support aron makatabang sa iyang pagbangon gikan sa nahitabo.
Human sa insidente, gipakusgan sa CCPO ang ilang police patrol ug ang implementasyon sa OPLAN PAKIGSANDUROT aron mapugngan ang mga krimen nga nalambigit sa kabatan-onan. Lakip niini ang mas daghang police visibility, adlaw ug gabii nga pagpatrolya, ug pagpakigtambayayong sa mga barangay, eskwelahan, ug social workers.
Matod sa CCPO, ang ilang tumong mao ang pagpanalipod sa mga kabataan, pagmintinar sa kalinaw ug kahapsay sa komunidad, ug paghatag og sayong interbensyon aron malikayan ang susamang mga insidente sa umaabot.
📸 CCPO
I via Renante Socia Lada