Nasakmit sa Cebu City Police Office (CCPO) ang gibanabanang 1 ka kilo o 1,000 gramos nga gidudahang shabu nga adunay kantidad nga ₱6.8 milyon atol sa usa ka buy-bust operation sa Barangay Mabolo, Cebu City, sa kadlawon sa Hunyo 27, 2026.
Ang operasyon gipahigayon sa Mabolo Drug Enforcement Unit ubos sa pagdumala ni PMAJ Thom Ed L. Taghoy II ug sa koordinasyon sa Philippine Drug Enforcement Agency (PDEA) Region 7.
Sa maong operasyon, nadakpan ang usa ka High-Value Individual (HVI) nga gipasanginlan og paglapas sa Sections 5 ug 11 sa Republic Act 9165 o Comprehensive Dangerous Drugs Act of 2002, nga may kalabotan sa pagbaligya ug pagpanag-iya og ilegal nga drogas.
Human sa pagdakop, gidala ang suspetsado sa Mabolo Police Station 4 aron ibutang sa kustodiya samtang giandam ang kaso nga ipasaka batok kaniya sa korte.
Sumala sa CCPO, ang kalampusan sa operasyon kabahin sa padayon nilang kampanya batok sa ilegal nga drogas ubos sa pagpanguna ni Officer-in-Charge PCOL Ricky C. Sumalde. Gipasalig usab sa kapulisan nga magpadayon sila sa intelihensiya nga operasyon ug pakigtambayayong sa PDEA aron mapugngan ang pagbaligya sa ilegal nga droga sa siyudad.
Giawhag usab sa CCPO ang publiko nga magpabiling alerto ug motabang sa kapulisan pinaagi sa pagreport sa mga kalihokan nga adunay kalabotan sa ilegal nga droga aron mapadayon ang usa ka luwas ug drug-free nga Cebu City.
📸 CCPO
I via Renante Socia Lada