Nadakpan ang 13 ka lalaki ug nasakmit ang kapin ₱20 milyon nga kantidad sa giingong ilegal nga petroleum products sa usa ka operasyon sa Ouano Wharf, Barangay Looc, Mandaue City, sayong buntag sa Pebrero 17, 2026.
Ang operasyon gipahigayon sa Criminal Investigation and Detection Group (CIDG) Mandaue City Field Unit, kauban ang CIDG Regional Field Unit 7-Special Operation Team ug Mandaue Coast Guard, inubanan sa lokal nga kapulisan.
Sumala sa report nga nadawat ni Robert AA Morico II, Director sa CIDG, nasakpan mismo ang mga suspek nga nagbalhin og petroleum products o “crudo” gikan sa tanker vessel padulong sa mga drum nga gisakay sa trak aron ibaligya. Wala sila’y lisensya o permiso gikan sa Department of Energy, hinungdan nga ilegal ang ilang gibuhat.
Nakompiskar sa mga otoridad ang 30 ka drum sa petroleum products, mga sakyanan nga gigamit sa pag-transport, ug usa ka tanker vessel. Ang tanang nasakmit gibanabana og kantidad nga ₱20,514,000.
Giingon sa CIDG nga supak sa balaod ang pagbaligya o pag-apod-apod sa petroleum products nga walay tukmang lisensya ubos sa Batas Pambansa Blg. 33 ug Presidential Decree 1865.
Nagpasidaan usab ang CIDG nga magpadayon sila sa kampanya batok sa ilegal nga pagbaligya sa lana ug uban pang ilegal nga kalihokan. Giawhag usab nila ang publiko nga mo-report kung adunay kahibalo sa susamang kalapasan sa ilang lugar.
Source: CIDG
I via Renante Socia Lada