Naluwas sa kapulisan ug mga opisyal sa Medellin, Cebu ang 12 ka tawo gikan sa duha ka pamilya nga nakasinati ug grabeng kahadlok ug kabalaka human sa kusog nga linog nga nahitabo niadtong Setyembre 30, 2025. Nahitabo ang insidente sa Christ the King Church sa Sitio Lipata, Barangay Gibitngil niadtong Miyerkules, Oktubre 8, 2025.
Matod sa Medellin Police Station, ang grupo nga ilang nasakop naglakip sa usa ka mabdos nga babaye ug usa ka 8-anyos nga bata.
Gi-report kini ni Barangay Captain Monina Monato alas-diyes sa buntag. Ang mga pulis nga sila PSSg Een Arreglado ug PCpl Clint Destacamento dayon misakay ug motor banca aron makaabot sa isla. Pag-abot nila, ilang nakita nga ang mga biktima nagpugong sa dalan gamit ang mga bangko sa simbahan ug klaro nga naglisod sa ilang kahimtang.
Sumala sa imbestigasyon, sukad pa Oktubre 1 wala na mokaon ang pamilya ug gitambog pa nila ang ilang relief goods sa dagat tungod sa grabeng trauma. Usa sa mga miyembro ang nasamdan sa liog human molaslas sa kaugalingon.
Sa tabang sa kapulisan, barangay, ug mga residente, naluwas silang tanan ug gihatagan ug psychological first aid ug tambag sa mga eksperto aron matabangan silang makabawi.
Ang mga otoridad nagpahimangno sa tanan nga kung adunay tawo nga naglisod o nag-antus sa hunahuna, ayaw kahadlok mangayo ug tabang. Tawagi ang NCMH Crisis Hotline sa 1553 (landline), SMART: 0919-057-1553, GLOBE: 0917-899-8727 (USAP), o Tawag Paglaum Centro Bisaya sa 0966-467-9626 / 0939-936-5433 / 0939-937-5433. Libre kini ug open 24 oras matag adlaw.
I via Renante Socia Lada