Mitubo na sa 111 ang gidaghanon sa mga namatay tungod sa Bagyong Tino (Kalmaegi), base sa pinakabag-ong ulat alas-7 sa gabii, Miyerkules, Nobyembre 5, 2025. Ang maong bagyo nagbilin og dakong kadaut ug kasakit sa daghang pamilya sa probinsya sa Cebu.
Pinakadaghan sa mga biktima ang natala sa Liloan nga adunay 35 ka patay, samtang 25 usab ang namatay sa Compostela. Ang maong mga dapit maoy pinakagrabeng naapektohan sa pagbaha ug landslide human sa walay hunong nga ulan nga dala sa bagyo.
Sa Cebu City ug Mandaue City, misaka usab ang bilang sa mga namatay ngadto sa 12 matag siyudad, samtang padayon ang pagpangita sa mga missing person ug pagresponde sa mga residente nga nanginahanglan ug tabang.
Matod sa mga opisyal sa Disaster Risk Reduction and Management Office (DRRMO), daghan pa gihapon ang mga lugar nga lisod maabot tungod sa natabunan nga karsada ug naputol nga linya sa komunikasyon ug kuryente.
Padayon ang paningkamot sa lokal nga kagamhanan ug mga volunteer aron makuha ang mga lawas sa mga biktima ug matabangan ang mga buhing naapektuhan. Gipahimangnoan usab sa mga awtoridad ang publiko nga magpabiling mabinantayon samtang padayon pa ang peligro sa pagbaha ug pagdahili sa yuta.
I via Renante Socia Lada