Ang Police Regional Office 7 (PRO7) ubos sa pamunoan ni Police Brigadier General Redrico A. Maranan nagpahinumdom pag-usab sa tanang personel sa respeto, disiplina, ug propesyonalismo sa paggamit sa social media, lakip ang vlogging, livestreaming, ug paghimo og online content.
Kini nga pahimangno misunod sa insidente nga nahitabo sa Talisay City, Cebu, diin usa ka online post sa usa ka pulis nakit-an nga dili uyon sa mga operational protocols ug ethical standards sa PNP.
Gipasabot sa PRO7 nga hugot kini nga nagsunod sa DPCR Memorandum Circular nga giisyu niadtong Setyembre 10, 2024, nga naglatid sa “Guidelines in Posting of Contents in Social Media.” Gisiguro niini nga adunay hustong balanse sa creative expression ug professional accountability, aron malikayan ang mga post nga makadaot sa operasyon, tawhanong katungod, o hulagway sa Philippine National Police.
Ang maong pahimangno usa usab ka pagpanawagan sa tibuok kapulisan aron sundon ang direktiba ni Presidente Ferdinand R. Marcos Jr., nga nag-awhag sa tanang kawani sa gobyerno nga magpabilin nga matinud-anon, disiplinado, ug responsable, bisan sa serbisyo o sa paggamit sa social media.
Gidili sa PRO7 ang mga online content nga nagpakita sa sayop nga paggamit sa uniporme, kagamitan, ug pasilidad sa PNP, ingon man livestreaming sa sensitibong operasyon, komentaryong politikal, o komersyal nga endorsements.
Hinuon, gidasig ni PBGEN Maranan ang mga pulis nga mohimo og edukasyonal, makapadasig, ug makatawhanong content nga nagpakita sa maayong imahe sa kapulisan ug sa ilang papel sa kalinaw, kaayohan, ug pagrespeto sa tawhanong katungod.
Nagpabilin ang PRO7 nga komitado sa responsable ug matinahuron nga paggamit sa social media, aron mapakita ang tinuod nga mga prinsipyo sa PNP- disiplina, pagkamatinuoron, ug tinuoray nga serbisyo sa katawhan.
Source: PRO7 PIO
I via Renante Socia Lada