Pormal nang gipirmahan ni Cebu Governor Pamela Baricuatro ang 2026 Annual Budget Ordinance human kini maaprobahan sa ikatulo ug katapusang pagbasa sa Cebu Provincial Board nga gipangulohan ni Vice Governor Glenn Anthony Soco. Ang maong budget nagkantidad og ₱11.9 bilyon gikan sa General Fund sa probinsya alang sa tuig 2026.
Gitambongan ang pagpirma sa budget ordinance ni Vice Gov. Soco, Board Member Celestino “Tining” Martinez III nga maoy nagsulat sa ordinansa ug chairperson sa Committee on Budget and Appropriations, uban sa ubang mga miyembro sa Provincial Board ug SP Secretary Atty. Pulchra Marie Acevedo.
Human sa pila ka bulan nga tensyonado nga diskusyon ug balik-balik nga special sessions, sa katapusan naaprubahan na sa 17th Sangguniang Panlalawigan—nga giilang dominado sa oposisyon—ang gitawag nga “People’s Budget” sa Baricuatro administration niadtong Enero 8, 2026.
Matod ni Governor Baricuatro, dakong kalampusan kini sa iyang administrasyon tungod kay makalihok na og bug-os ang probinsyal nga gobyerno base sa ilang unang annual spending plan. Pasalamat usab siya sa mga miyembro sa SP nga nagpakita og kooperasyon aron mahuman ang proseso sa pag-aprubar.
Iyang gipadayag nga bisan adunay sayong panaglalis, napamatud-an nga posible ang panaghiusa sa executive ug legislative branches alang sa kaayohan sa katawhan sa Sugbo.
Samtang si Vice Governor Soco miingon nga ang budget gihimo nga maampingon ug andam sa umaabot. Iyang giila ang ₱11.9 bilyon nga budget nga “konserbatibo” tungod kay nakabase kini sa realistiko nga kita sa probinsya, dili sa sobra nga pagbanabana.
Gidugang pa ni Soco nga andam ang Provincial Board nga motabang sa Executive Department aron mapalambo pa ang kita ug serbisyo sa probinsya.
Sumala usab ni Board Member Martinez, mitaas ang kalisod sa budget process tungod sa kausaban sa liderato sa probinsya, apan bisan pa niini, nagkasinabot gihapon ang duha ka sanga sa gobyerno aron mapasar ang budget alang sa 2026.
Source: Cebu Province PIO
I via Renante Socia Lada