Hapsay ug Malinawon nga nahuman ang Penitential Walk with Jesus nga gihimo sa Enero 8, 2025, ug walay natalang bisan unsang krimen. Sumala sa Cebu City Disaster Risk Reduction and Management Office (CDRRMO), hapit 300,000 ka deboto ang miapil sa kalihokan.
Matod sa Police Regional Office 7 (PRO7), nahitabo ang malinawon nga kalihokan tungod sa hapsay ug hugot nga security plan. Lakip niini ang daghang kapulisan nga gibutang sa mga dalan, klaro nga deployment sa personnel, koordinasyon sa force multipliers, ug kanunay nga pagmonitor sa mga agianan ug tigum-anang lugar.
Dako usab ang tabang sa maayong panaghiusa sa PRO7, lokal nga kagamhanan, traffic management offices, emergency responders, ug mga boluntaryo aron masiguro ang hapsay nga lihok sa mga tawo ug dali nga responde kung adunay emerhensiya.
Gipasalamatan ni Regional Director PBGen Redrico A. Maranan ang disiplina sa mga deboto ug ang dedikasyon sa mga security forces. Matod niya, responsibilidad sa tanan ang kaluwasan sa publiko ug ehemplo ang kalampusan sa maong kalihokan alang sa umaabot pang dagkong kalihokan.
Dugang pa niya, padayon pang susihon ug ebalwasyonon sa PRO7 ang maong kalihokan aron mas mapalig-on pa ang seguridad ilabi na sa Sinulog 2026, nga gilauman mas daghan pa gyud og tawo.
Gipasalig sa PRO7 nga magpadayon sila sa aktibo nga pagplano, lig-on nga koordinasyon, ug flexible nga security measures aron masiguro ang kaluwasan sa tanang dagkong kalihokan sa Central Visayas.
Source: PRO7 PIO
I via Renante Socia Lada