Nakasakmit og kapin ₱170 milyon nga kantidad sa ilegal nga sigarilyo ang Police Regional Office 7 (PRO7) sukad niadtong Enero 2026, isip kabahin sa ilang padayon nga kampanya batok sa smuggling sa tibuok Central Visayas.
Sumala sa rekord, nakumpiskar sa kapulisan ang 138,516 ka pakete ug 3,231 ka ream sa sigarilyo pinaagi sa gipalig-on nga intelligence monitoring ug hiniusang operasyon batok sa mga nagdala, nagtipig, ug nagbaligya og smuggled nga mga produkto sa tabako.
Gipadayag ni Regional Director, PBGen. Redrico A. Maranan nga ang kampanya kabahin sa lig-on nga paningkamot sa rehiyon sa pagsunod sa direktiba ni DILG Sec. Juanito Victor C. Remulla, nga wagtangon ang paghimo, pagbaligya, ug pag-apod-apod sa ilegal nga sigarilyo.
Matud pa ni Maranan, ang matag operasyon batok sa ilegal nga sigarilyo dili lamang aron pugngan ang smuggling, kundili aron mapanalipdan usab ang komunidad batok sa mga kriminal nga grupo ug masuportahan ang mga lehitimong negosyo.
Gipasabot usab sa PRO7 nga magpadayon sila sa pagpalig-on sa ilang mga operasyon uban sa ubang ahensya sa gobyerno ug mga lokal nga panggamhanan aron mapadayon ang kalampusan sa kampanya batok sa ilegal nga sigarilyo sa Central Visayas.
Giawhag usab ang publiko nga motabang pinaagi sa pagreport sa bisan unsang impormasyon kabahin sa paghimo, pagtipig, pagbiyahe, o pagbaligya sa ilegal nga sigarilyo sa ilang lugar.
Source: PRO7 PIO
I via Renante Socia Lada