Nakarekord og dakong kalampusan ang Police Regional Office 7 (PRO7) human makasikop og 336 ka mga suspek ug makakumpiskar og 45 ka pusil ug hapit ₱2 milyon nga kantidad sa ilegal nga drogas sulod sa 72 ka oras nga sunod-sunod nga operasyon gikan Pebrero 26 hangtod 28, 2026 sa tibuok Central Visayas.
Ang operasyon nagtumong batok sa ilegal nga drogas, mga wanted person, ilegal nga pusil, ug ilegal nga sugal.
Sa kampanya batok sa drogas, nakumpiskar ang kapulisan og 288.87 gramos nga gituohang shabu ug 21.15 gramos nga uga nga dahon sa marijuana nga nagkantidad hapit ₱2 milyon.
Sa manhunt operation, 94 ka mga pugante ang nadakpan, lakip ang 25 ka Most Wanted Persons.
Samtang sa kampanya batok sa loose firearms, 21 ka suspek ang nasikop. Narekober usab ang 45 ka pusil, usa ka granada, ug 80 ka bala.
Sa operasyon usab batok sa ilegal nga sugal, 48 ka katawhan lakip ang mga ushers ug mananaya ang nadakpan, diin ang number games maoy adunay pinakadaghan nga kaso.
Gidayeg ni PBGen. Redrico A. Maranan, Regional Director sa PRO7, ang kalampusan sa operasyon. Matud pa niya, pinaagi sa pagdakop sa gatusan ka mga suspek ug pagkumpiskar sa mga pusil ug ilegal nga drogas, nagpadala sila og kusog nga mensahe nga walay lugar ang kriminalidad sa Central Visayas.
Giawhag usab sa PRO7 ang publiko nga magpadayon sa pagreport sa mga kadudahang kalihokan aron mapadayon ang kalinaw ug kahapsay sa rehiyon.
Source: PRO7
I via Renante Socia Lada