Nangayo og tabang ang kapulisan sa Cebu City Police Office (CCPO) sa publiko aron ma-dakpan si Leonardo R. Manto Jr., nga nailhan usab sa alyas “Jun Manto”, ang giingong nag-unang suspek sa pagpusil-patay kang Police Captain Joel Deiparine sa Criminal Investigation and Detection Group (CIDG) Regional Field Unit 7.
Sumala sa CCPO, usa ka ₱100,000.00 cash reward ang gitanyag alang sa bisan kinsa nga makahatag og kasaligang impormasyon nga makapadangat sa pagkasikop o kasamtangang kahimutangan ni Manto, nga giingong usa sa mga responsable sa ambush sa Barangay Sudlon 2, Cebu City, niadtong Oktubre 25, 2025.
Si Deiparine namatay diha-diha human sa kalit nga pagpabuto sa tulo ka armado nga lalaki samtang sila sa iyang kauban nga si Police Executive Master Sergeant Artchel Tero nagbantay sa ilang gi-surveillance nga target ubos sa OPLAN “Paglalansag Omega.”
Giawhag sa kapulisan ang publiko nga kadtong adunay impormasyon kabahin sa gitaguan sa suspek mahimong motaho sa pinakaduol nga police station o mo-dial sa 911 hotline.
Gipaniguro sa CCPO nga hugot nga tagoan ang identidad sa mga impormante, ug gipasalig usab nga buhaton nila ang tanan aron makab-ot ang hustisya alang sa napatay nga opisyal sa CIDG.
I via Renante Socia Lada