Usa ka kasamok sa relasyon ang nauli sa makalilisang nga krimen human mapatay ang usa ka 42-anyos nga babaye sa kamot sa iyang kanhi kapuyo sa Sitio Quadra, Barangay Lagtang, Talisay City, alas-9 pasado sa buntag, Oktubre 26, 2025.
Ang biktima giila nga si Joyryn Padinas, residente sa maong lugar, samtang ang suspetsado mao si Eric Lucendo Conlu, hingkod ug taga-Antipolo Jugan, Consolacion, Cebu, nga hangtod karon gipangita pa sa mga otoridad.
Sumala sa imbestigasyon, nakadawat ang kapulisan og tawag gikan sa usa ka concern citizen nga may nahitabong gubot sa lugar. Sa pag-abot sa mga pulis, ilang naabtan ang biktima nga gahayang ug naglunang sa kaugalingong dugo.
Sumala sa imbestigasyon, naglalis ang duha sa wala pa mahitabo ang krimen. Ang away misangpot sa kasuko sa suspetsado nga giingong gidunggab ang biktima sa makadaghan nga higayon hangtod kini napatay.
Human sa insidente, dali nga misibat si Conlu sa dili pa matino nga direksyon. Padayon karon ang hot pursuit operation sa Talisay City Police aron madakpan ang suspetsado ug matino ang tinuod nga motibo sa krimen.
I via Renante Socia Lada