Matod sa Cebu City PIO nga gipaniguro ni Mayor Raymond Alvin Garcia nga hapsay gihapon ang pagpatuman sa seguridad atol sa pagsaulog sa Sinulog 2025 bisan pa man og adunay bag-ong mangulo sa Cebu City Police Office (CCPO).
Gipadayag kini ni Mayor Garcia atol sa press conference nga gipahigayon karong adlawa, Enero 13, 2025, isip tubag sa pangutana sa mga reporters.
Pulong niya, bisan kung giilisan sa Philippine National Police si P/Col. Antonietto Cañete isip CCPO director, dako iyang salig ni Konsehal Joel Garganera nga dili ra maapektohan ang pagpangandam.
Si Konsehal Garganera maoy labaw sa security committee sa Sinulog 2025 organizing committee.
Kabahin niini, gihatagan og direktiba ni Mayor Garcia si P/Col. Enrico E. Figueroa, ang natudlo nga CCPO officer-in-charge, nga iyang tun-an ang mga plano nga gibuhat alang sa Sinulog ug ipatuman kini.
Sa mao gihapon nga press conference, gisulti ni Mayor Garcia nga dili gyud maayo nga tayming ang paghulip kang Cañete, ilabi na nga naa sa tungatunga na sa pagpangandam alang sa Sinulog.
Sa iyang bahin, gipaniguro sab ni Figueroa nga mabuhat niya og tarong ang direktiba nga gihatag ni Mayor Garcia kaniya.
“Mami-maintain pa rin po natin yung kaayosan n naplagplanohan nila nung mga nauna pa,” ingon niya.
“Ina-assure din natin kay Mayor na itong Sinulog Festival, base sa mga experience ko sa National Capital Region, ito po ay magamgampanan po natin ng maayos at tahimik at payapa,” dugang niya.
Sa laing bahin, gidayeg ni Mayor Garcia si Cañete sa maayong agi niini isip CCPO director.
“I’d like to commend and congratulate Col. Cañete for a job well done…. I think Col. Cañete is one of the best city directors that Cebu City ever had,” ingon niya. (Renante Socia Lada)
(Source: Cebu City PIO)