Cebu City – Miisyo ang CBCP o Catholic Bishops Conference of the Philippines og guidelines alang sa pagpahigayon sa Misa de Gallo gikan sa Disyembre 16 ngadto sa 24 subay sa safety protocol nga gilatid sa mga tinugyanan sa panglawas aron kalikayan ang pagpanakod sa Covid-19.
Base sa Circular No. 20-82, ang CBCP miingon nga ang mga Parokya padayong mopatuman sa pagpasul-obog face mask, pagtamod sa social distancing ug pag-ban sa mass gathering sa siyam-ka-kaadlawon nga misa sa Pasko.
Gisugyot sa CBCP nga sugdan ang misa sa alas 6 sa gabii ug ang kataposang misa, alas 6 sa buntag.
Suma pa sa CBCP, ang mga obispo uban sa kaparian ug katimbang ang mga LGUs o local government units, mahimong motakda og dugang misa sa kaadlawon sa lapad nga venue nga masud og daghang tawo nga dili makalapas sa social distancing.
Sa sayo pa, si Cebu City Mayor Edgardo Labella miingon nga itugot niya ang Misa de Gallo basta anha lang sud sa simbahan.
Niadtong Martes, nakigtagbo kang Labella ang kadagkoan sa simbahan aron pagtuki sa mga butang labot sa Misa de Gallo.
Si Mons. Camilo Alia, team moderator sa Cebu Metropolitan Cathedral, miingon nga natapos ang miting nga walay nakab-ot nga final decision busa posibleng magpatawag og laing tigum ang mayor.
(Jhon Tadlip/JTY, photo courtesy of Cebu Metropolitan Cathedral Facebook page)
(Source: Catholic Bishops Conference of the Philippines (CBCP))