Sugdan karong bulana ang redevelopment sa Bolonsori cemetery ngadto na sa City Memorial Park human nakompleto ang gikinahanglang proseso alang sa maong katuyoan.
Ang redevelopment himuon phase-by-phase ug sugdan kini sa perimeter wall ug 5- storey columbarium nga maoy plastaran sa mga una nang nalubong sa Phase 1 ug Phase 2.
Subay niini, nanawagan ang kagamhanang local pinaagi sa City Local Environment and Natural Resources Office (CLENRO) ug Memorial Park Board niadtong adunay mga kabanay nga nipanaw na ug nalubong sa Phase 1 ug Phase 2 nga anaay private memorial lots nga pwede nang ibalhin ang ilang mga mahal sa kinabuhi.
Apan gipasabot usab sa Memorial Park Board nga mahimong magpabilin ra usab ang ilang kabanay sa kasamtangang sementeryo nga mobisita lamang sa annex office sa CLENRO nga anaa nahimutang sulod sa Bolonsori alang sa dugang kasayuran.
Ang Bolonsori cemetery adunay 19 ka ektaryang luna ug gipaningkamotan ni Mayor Oscar Moreno nga masugdan kini sa dili pa matapos ang iyang termino.
Ang redevelopment sa City Memorial Park o Bolonsori cemetery pangulohan sa City Memorial Park Board nga gilangkoban sa pribadong sector kauban ang academe, interfaith ug mga buhatan sa City Hall.
(Source: City Information Office | Cagayan de Oro City Philippines Facebook page)