Ning nagpadayun ang hulga sa pandemya sa tibouk kalibutan, wala kini nahimong babag sa panggamhanang probinsya aron dili mapadayun ang mga kalihokan nga adunay kalambigitan sa paghatag pagtagad sa kaayuhan sa katilingban.
Niadtong nakalabayng semana, ang Panggamhanang Lokal sa Misamis Oriental pinaagi sa Provincial Early Childhood Care Development Office pinanguluhan ni Ms. Maryden T. Ocot kauban ni Ms. Katherine A. Magallanes ug Ms. Jennyfer M. Timkang, ilng gisalmotan ang ika-25 nga Virtual Conference sa Asian Federation on Intellectual Disabilities (AFID).
Kini adunay tema nga “Transforming Schools and Communities for Inclusion” diin gipasiugdahan sa Philippine Association for the Intellectual Disabilities (PAFID) Inc. nga nagpunting sa pagmugna og palisiya ug mga aksyon nga nagpromotar sa patas ug paglakip sa mga indibidwal nga adunay Intellectual Disabilities ngadto sa mga tunghaan ug komunidad.
Sukad sa pagpatuman sa AFID, karong tuiga maoy ikatulong higayon nga ang nasud sa Pilipinas nahimong host sa maong conference kung asa gisalmotan sa mga nasud sa Asya sama sa Hong Kong, India, Japan ug uban pa.
Ang pinakauna nga Virtual AFID Conference karong tuiga nagtumong sa paghatag sa usa ka internasyunal nga plataporma alang sa mga magtutudlo, propesyonal, researchers, ginikanan, estudyante, ug uban pang mga grupo gikan sa lokal ug internasyunal nga komunidad nga nag-ambit sa adbokasiya ug kaikag sa pagbag-o sa mga tunghaan ug komunidad pinaagi sa paglakip sa tanan nga mga aksyon.
Lakip sa maong adbokasiya mao ang edukasyon ug ang kalambuan niini, sosyo-sibiko nga pagduso, pakiglambigit sa pamilya ug komunidad ug mga palisiya alang sa kalidad nga edukasyon ug malungtaron nga pagkat-on alang sa paghatag gahum ug kagawasan taliwala sa global nga pandemya.
Prayoridad sa pamunuan ni Gobernador Bambi Emano nga matabangan ang tanan pinaagi sa pagpromotar sa kalidad nga edukasyon ug paghimo og kabag-ohan aron mas mapalambo pa ang maayong pagkat-on sa tanang Misamisnon.
(Source: Misamis Oriental Provincial Information Office Facebook page)
