Hangtud Mayo 20 na lamang ang gihatag sa LGU CDO sa pagpamakuna niadtong 5-11 years old batok COVID 19 alang sa first dose.
Matud ni Acting City Health Officer Dr. William Bernardo, taman na lang usab sa Hunyo 15 ang paghatag og second dose sa maong category, sanglit gipaundang naman sa national government ang pagpalit sa mga bakuna ug posibleng dili na kini mopalit pa og dugang.
Gipasabot ni Dr. Bernardo nga nagpahibalo na ang rehiyonal nga buhatan sa Department of Health ngadto sa Department of Education alang sa pag-aghat sa mga kabataan o school-aged children nga magpabakuna na isip pagpangandam sa face-to-face classes.
Dugang pa ni Bernardo nga anaa sa 102,046 ang anaa sa 5-11 years old sa Cagayan de Oro ug 20,482 lamang ang nakadawat sa first dose basi sa Mayo 15 nga datos sa City Health Office.
Subay niini, giaghat ang mga ginikanan nga adunay 5-11 years old sa pagpahimulos sa libre’ng bakuna sa dili pa ang Mayo 20 aron dili makasinati sa moderate to severe symptoms ang kabataan kung ugaling mataptap sa virus ug andam na kini sa face-to-face classes.
(Source: Cagayan de Oro City Philippines Facebook page)