Kompleto nga primary COVID-19 vaccine series, booster dose ug hugot nga pagtuman sa minimum health protocols.
Kini gihapon ang gihingusgan ni City Epidemiologist Dr. Teodulfo Joselito Retuya Jr. aron mapanalipdan ang kaugalingon batok sa sakit nga COVID-19.
Ang pamahayag giluwatan ni Dr. Retuya atol sa unang COVID-19 press briefing ubos sa administrasyon ni Mayor Rolando ‘Klarex’ Uy sa miaging adlaw.
Sigon sa datos ni Dr. Retuya sulod sa duha ka tuig, nasinati sa syudad ang tulo ka mga hugna sa pagsaka sa kaso sa COVID-19 o ‘surge’ nga naglangkob sa Alpha, Beta, Delta ug Omicron COVID-19 variants.
Mitala usab ang syudad og 941 deaths kinsa mayoriya kanila ang nakabsan sa kinabuhi sa wala pa gisugdan ang vaccination rollout program.
Gipunting ni Dr. Retuya ang kamahinungdanon sa pagpabakuna sa COVID-19 vaccines aron ugaling mataptan sa COVID, mas menus, mild ug halos walay sintomas ang masinati.
Importante usab ang booster shots pila ka bulan human makakompleto sa primary series ilabina sa mga immunocompromised, senior citizens ug healthcare workers nga kanunay ‘exposed’ sa infection.
Sa laing bahin, sumala sa City Health Insurance Office, anaa pa sa 79% o 47,948 ang nakakompleto sa first ug second dose sa COVID-19 vaccines sa mga senior citizens gikan sa target nga 60,138.
Busa, padayon gipanawagan ang mga senior citizens nga di na maglangan og moadto na sa mga vaccination sites sa syudad ug i-avail ang libre nga bakuna aron dugang proteksyon batok COVID.
(Source: Cagayan de Oro City Information Office Facebook page)
