Nagpabiling aktibo sa pagtabang ug pag-rescue ang Oro Response and Processing Section (ORPS) sa City Social Welfare and Development ning syudad.
Ning semanaha, adunay gitabangan ang ORPS nga tulo ka kliyente pinaagi sa paghatag og transportation assistance ubos sa ‘Balik Probinsya Program’.
Gawas niini, mihatag usab sila og medical intervention sa mga kliyente sa Oro Dalampanan, usa ka temporary shelter alang niadtong adunay diperensya sa pangutok kon mentally challenged, ug stranded individuals ug ilang pamilya.
Tumong sa ORPS nga matabangan ang mga kabataan ug pamilya nga anaa naglatagaw sa kadalanan kon ‘street mendicants’, lakip kadtong mga kliyente sa centers ug institutions sa LGU-CDO, ug mga indibidwal nga gustong makauli sa ilang gipuy-an apan wala’y ikagahum nga plete.
(Source: Cagayan de Oro City Information Office Facebook page)