Cagayan de Oro: MisOr Cares Dul-An Duha Ka Tuig Na Ang Pagpreparar Og Pagkaon Sa Mga Checkpoint Personnel

0
432

Dili ikalimod nga ang pamunuan ni Governor Bambi Emano usa ka dakong panalangin hilabina sa tanang lumulupyo sa lalawigan sa Misamis Oriental.

Gani, bisan paman sa gisagubang niining panahon sa pandemya, wala kini nagduhaduha sa paghatag og pagkaon alang sa mga personahe nga nakadestino sa matag entry ug exit nga checkpoint sa lalawigan.

Ang maong pagkaon gilangkoban sa pamahaw, paniudto ug panihapon kung asa ang Lokal nga Panggamhanan sa Misamis Oriental pinaagi sa Misamis Oriental Care System kon MisOr Cares maoy regular nga gahatag niini.

Ang mga checkpoint personnel gilangkoban sa mga kapulisan, kasundalohan, PDRRM Officers, BFP officers ug mga Coast Guard Officers nga sa walay pagduha-duha mituman sa ilang katungdanan ug nag-alagad nga matinud-anon subay sa gipanumpaan  nga moserbisyo alang sa tanang katawhan taliwala sa risgo nga dala sa Covid-19.

Nagsugod sa pagpakaon sa mga checkpoint personnel ang kagamhanan sa probinsya niadto pang Abril 2, 2020 ug kapin usa na ka tuig sa pagpang-apod apod og food pack nga sa kinatibuk-an moabot na sa 323,205 na ang natunol sa buhatan sa MisOr Cares pinanguluhan sa maabtikong ulo niini nga si Ms. Sandra Lim.

Tungod niini, mapasalamaton kanunay ang tanang mga personahe sa checkpoint sa inisyatiba sa panggamhanan ubos sa pagdumala ni Gobernador Bambi Emano nga sila dili magutom panahon sa ilang pagtukaw sa matag checkpoint.

Kini nagpakita nga adunay dakong kasingkasing ang amahan sa lalawigan Gobernador Bambi sa tanang mga frontliners nga walay hunong sa pagpaningkamot ug pagsakripisyo alang sa katawhan inubanan sa tinguha nga maabagan ang ilang adlaw adlaw nga pagkaon hilabina niining panahon sa pandemya.

(Source: Northern Mindanao DAILY Source Facebook page | Provincial Information Office – Misamis Oriental)

LEAVE A REPLY

Please enter your comment!
Please enter your name here