Pormal nga milagda karong adlawa, Hunyo 8, sa Memorandum of Agreement (MOA) ang LGU-CDO uban ang partner academic institutions kalabot sa pagpadayon sa partnership sa siyudad alang sa City Scholarship program.
Mismo si Mayor Rolando “Klarex” Uy ang nanguna sa paglagda sa MOA kauban ang mga representante sa partner academic institutions ug gisaksihan ni Committee on Education Chairperson City Councilor Suzette Magtajas-Daba ug City Scholarships Office Head Richel Petalcurin-Dahay.
Ang mga partner academic institutions gilangkoban sa Xavier University-Ateneo de Cagayan, Lourdes College, University of Science and Technology of Southern Philippines, Liceo de Cagayan University, PHINMA- Cagayan de Oro College, Capitol University, Pilgrim Christian College, Southern Philippines College ug STI College Cagayan de Oro.
Samtang tulo ka partner academic institutions usab ang nadugang karong tuiga ug kini mao ang Golden Heritage Polytechnic College, Vineyard International Polytechnic College ug Informatics Computer Institute-Cagayan de Oro Center, Inc.
Nalatid sa MOA nga ang pagpili sa scholarship program dili pinaagi sa political accommodation ug ang partner academic institution maoy magdumala sa primary role diha sa pag-implementar sa maong programa.
Ang maong MOA naghtag usab og full scholarship sa mga napili nga city scholar alang sa tibuok tuig sa kurso niini nga napili, lakip ang libreng tuition ug miscellaneous fees.
Nasayran nga sa tuig 2018, gipalabang sa LGU-CDO ang Scholarship Code of 2018, diin namugna ang administrative office, pagpalapad sa scholarship tracks, ug nagpasayon sa implementasyon sa scholarship program pinaagi sa partner academic institutions.
Mandato usab sa maong ordinansa nga ang LGU gikinahanglan maghatag og scholarship program nga maoy tubag sa gikinahanglan sa local ug international industry lakip na ang pagpalambo sa life skills nga gikinahanglan sa globalized economy.
Kasamtangan, aduna na’y kapin 10,000 ka city scholars ang siyudad lakip na ang bag-o nga nadawat niadtong Hunyo 2, diin nagpamataud lamang sa saad ni Mayor Klarex Uy nga iyang paaboton sa 10,000 city scholars sa iyang unang termino isip mayor sa Cagayan de Oro city.
(News and photo courtesy of Cagayan de Oro City Information Office)