Samtang wala gidid-an nga magdala og mga pets o mga binuhing mananap sulod sa Boulevard, ang syudad ubos sa administrasyon ni Mayor Rolando `Klarex’ Uy pinaagi sa Technical Working Group sa Rio de Oro Boulevard nagpahimangno nga limpiyohan ang hugaw niini.
Kini human nakadawat og taho ang TWG nga gipasagdan lang sa tag-iya sa mga ‘pets’ ang hugaw sa mananap (tae, ihi).
Si Atty. Jose Edgardo Uy, nangulo sa TWG namahayag nga ang husto nga pamatasan mao nga limpiyohan sa mga nanag-iya og mananap ang hugaw sa ilang mga pets aron dili kini matumban sa uban nga mga nanuroy sa Boulevard ug magpabilin ang kalimpiyo niini.
Gani, sa uwahing meeting sa TWG usa sa nauyonan nga ipatuman nga palisiya niadtong magdala sa ilang mga pets mao nga butangan nila kini og diaper aron masiguro nga walay mabilin nga hugaw sa ilang mananap.
Samtang magpahigayon usab og operation pamatong sa mga laaw nga mananap ang mga personahi sa City Veterinary Office diha sa Boulevard.
Alayon niini, giaghat ni Atty. Uy ang mga nanag-iya og mananap sa paghikot aron dili maapil sa pamatong.
(News and photo courtesy of Cagayan de Oro City Information Office)