Nagpadayon ang kagamhanan sa dakbayan pagtunol og suporta alang sa malambuong kaugmaon sa kabataan.
Sa sesyon kagahapon nga gidumala ni Bise Mayor Kikang Uy, giuyonan ang ordinansa nga naghatag og katungod ni Mayor Oscar Moreno pagpirma sa Memorandum of Agreement (MoA) tali sa Xavier University (XU).
Kini naglangkob sa kolaborasyon sa pagpahigayon og On the Job Training (OJT), practicum o internship program sa mga tinun-an sa College of Agriculture, Agricultural and Biosystems Engineering (ABE) ug Development Communication (DevCom) diha sa Agricultural Productivity Office (APO).
Sa maong pamaagi maabagan sa dakbayan ang mga tinun-an ingon man makadani sa uban pang kabataan nga mokuha sa kurso nga maghatag og dugang kaarangan sa ilang kinabuhi.
Niini, ang buhatan gilantaw nga mopaambit sa ilang kasinatian, teknolohiya ug metodolohiya aron makab-ot ang mga tumong ug panglantaw dinha sa pagpalambo sa ilang kapanginabuhian.
Sa MoA, ang unibersidad modestino og faculty nga maoy molihok isip OJT, practicum o’ internship coordinator, maghikay sa skedyol sa mga trabaho alang sa OJT, pagsiguro nga ang matag trainee magsuot sa gikinahanglan nga Identification Card (ID) ug saktong sapot samtang anaa sa lugar atol sa mga oras sa pagbansay bansay.
Samtang ang kagamhanan maoy magdestino og kawani nga magsilbing supervisor sa mga trainees ug magdawat og trainees subay sa mga regulasyon og palisiya.
Ang ordinansa nga gipalabang sa Konseho gipaluyohan sa Komite sa Edukasyon ni Konsehal Suzette Magtajas-Daba ug Komite sa Pamalaod ni Konsehal Ian Mark Nacaya. (SP | RN Quiblat, photo courtesy by JB Dacer)
(Source: CdeO City Council Facebook page)