Cebu: Insidente sa sunog sa Central Visayas misaka ug 21% itandi sa samang higayon sa miaging tuig

0
157

Cebu City – Misaka ug 21 porsento ang gidaghanon sa insidente sa sunog sa Rehiyon Siete gikan sa Enero hangtud sa Marso 2022 kung itandi sa samang panahon sa imaging tuig.

Visit RPN DYKC Cebu

Kini ang natala sa Bureau of Fire Protection Central Visayas (BFP-7).

Gikan sa 226 ka fire incidents nga natala tibook rehiyon atol sa unang quarter sa 2021, ang BFP-7 Regional Operations Division nakatala ug 273 fire incidents atol sa unang quarter sa 2022.

Gibutyag ni Chief Inspector Raul Bustalino, chief of Regional Operations Division sa BFP-7 nga ang sagad sa mga nag-unang hinungdan sa mga insidente naglakip sa electrical ignition gumikan sa loose connection, electrical ignition gumikan sa arcing ug open flame gikan sa pagluto ug mga nabiyaan nga mga kandila.

“Kasagaran ana electrical kay labi mao man g’yod ni gigamit especially sa residential, overloading, open flame kanang mga grilling,” pasabot ni Bustalino.

Basis a records sa BFP-7 Operations Division, 109 gikan sa 273 fire incidents nga natala sa unang quarter sa 2022 nahitabo niadtong Enero.

Unang nahitabo ang sunog sa mercantile establishment sa Barangay Ermita Syudad sa Sugbo niadtong Enero 3.

Ang Sugbo nga dunay labing daghan nga populasyon sa rehiyon, mao sab ang labing daghan nga sunog gikan sa Enero ngadto sa Marso 30.

Sa maong mga sunog, 60 ang natala sa dakbayan sa Sugbo, pito sa Syudad sa Mandaue ug unom sa Lapu-Lapu.

Pipila ka mga dagkong sunog naglakip sa industrial establishment sa Syudad sa Talisay ug laing business establishment sa Barangay Mabolo, dakbayan sa Sugbo.

Labing menus P28 milyones nga balor sa danyos sa property human mi-ulbo ang sunog sa warehouse nga gibutangan sa mga noodles sa Barangay Cansojong, Syudad sa Talisay, niadtong kadlawon sa Marso 21, samtang mokabat sa ₱ 39.2 milyones nga balor sa property ang naugdaw sa sunog sa usa ka mall sa Barangay Mabolo, Syudad sa Sugbo pagka Enero 28.

Sa sunog sa Enero hangtud sa Marso ning tuiga, miabot ug lima ka kinabuhi ang nakalas ug laing 28 ang nanga angol. (Jhon Tadlip)

(News & photo courtesy of Bureau of Fire Protection-Central Visayas)

LEAVE A REPLY

Please enter your comment!
Please enter your name here