Gipasidunggan sa Philhealth regional office ang JR Borja General Hospital (JRBGH) Konsulta Center isip Konsulta Providers Awardee ubos sa programa niining Philhealth Konsulta Package o Konsultasyong Sulit at Tama.
Na-accredit ang JRBGH sa maong programa niadtong Hunyo 21, 2021 ug nakaserbisyo na sa 243 patients hangtud niining panahona.
Usa ang JRBGH sa tulo lamang ka mga health care providers sa rehiyon ang nakadawat sa pasidungog diin naglakip na sa Gingoog City Health Office ug sa Tagaloguin-Adona Polymedic Diagnostic Center, Inc sa Ozamis City.
Ang Konsulta Package naglangkob sa initial ug follow-up primary consultations, health screening, assessment ug piniling diagnostic services ug mga tambal nga anaa na karon sa JRBGH.
Subay niini, gipasalamatan ni Mayor Oscar Moreno ang mga kadagkoan sa Philhealth sa dakong tabang niini sa pagpalambo sa serbisyo sa JRBGH.
Matud ni Mayor Moreno dako na ang kausaban ug kalamboan sa JRBGH sugod sa iyang paglingkod niadtong tuig 2013, diin mikita lamang kini og kapin P9 milyones ug karon anaa na sa P257 milyones.
Tungod niini, nanghinaut ang mayor nga magpadayon ang serbisyo sa Philhealth. “Philhealth helped redeemed government’s health program,” saysay ni Mayor Moreno.
(Source: Cagayan de Oro City Philippines Facebook page)
